Es isch e mou...

So damit das mou klärt isch wie, dass ig uf d`Idee chume der Frou Zosso (mini Handarbeitslehrerin für au wo ned in Buchsi it Schuw si) aui Ehre z`mache. Es isch nämlich e so gsi, und das beruht uf ere wohre Gschicht. Einisch am ne schöne Winternomittag: Ig ganz eleini im Boarderlokal uf Chape-suhchi. Da ig, wie so oft, me wieder mou ned he chöne entscheide, he ig nach Stunde das Gschäft wieder ohni Chape verloh. …. Zu mim Glück, denn wie ig he müsse merke, louft det obe jede Depp mit der gliche Chape ume. Chum he ig das Gschäft verloh, he ig nume no Chapene gseh, wo ig fasch kouft hät. Uf em Trottoir, wartend uf e Bus, Kutsche rittend, gränend im Baby-chorb, mit Flohband und Line, in Uniform, mit Ski`s, mit em Bäse i de Finger, im BMW, Hochdütsch redend, ….  eifach zum dervolouffe! I mim Schock, bei ig is nöchste Wullegschäft inegloffe, und he mer d`Wulle für mini erst Chape kouft. So isch die erst B-Nuts Chape entschtande (dumm isch nume gsi, dass die so chli worde isch, dass si knapp mire Chatz gange isch). Naja noch einige Närvezämebrüch, Wutafäu und Agressionsterapie, het die ganzi Sach Form agno. Ig he Ungerstützig vo mire Mutter und Grossmutter bercho. So hei mir üs überleit, ou Euch e Unikati Chape azbiete! Nun mir biete Euch a, nech nie meh müsse ufrege, wüw jede Bajass euchi Chape a het. Üsi Chapene si aui es Unikat und das heisst, nume Du hesch die Chape und nume Du chasch se nochebstelle wenn Du möchtsch. Mer hoffe Du fingsch öbis wo der gfaut und wünsche Dir e gute Ziet ….. danke für`s ineluge. .... und wenn si no ned gstorbe si, de lisme si no hüte.